Рузахуновдун кыйноого алынганы боюнча прокуратура кылмыш ишин козгоду - Baleket.kg
СаясатЫсык жаңылык

Рузахуновдун кыйноого алынганы боюнча прокуратура кылмыш ишин козгоду

Baleket.kg — Бишкек шаарындагы Ленин райондук прокуратурасы кыргызстандык музыкант Викрам Рузахуновдун Алматыда кыйноого алынганы боюнча кылмыш ишин козгогондугун Башкы прокуратурадан билдиришти.

Эске сала кетсек, буга чейин Рузахуновдун өкүлү мындан улам Баш мыйзамдын 51-беренесинин 6-пункту иштей баштаарын, анда мамлекет өзүнүн аймагынан сырткаркы жерлердеги жарандарын коргой тургандыгын билдирген. Тагыраагы, казак бийлиги күнөөлүүлөрдү жазалабай турган болсо, анда кыргызстандык күч түзүмдөрүнүн өкүлдөрү аны сабагандарды таап, жоопкерчиликке тартуусу керек. Рузахуновдун жактоочусу Алматыда да кыйноолор боюнча иликтөө жүрүп жаткандыгын айткан.

Казакстандын Qazaqstan мамлекеттик телеканалы 9-январда митингдерге катышуу үчүн Кыргызстандан барды делген жарандын сурак берип жаткан видеосун жарыялаган. Ал белгисиз адамдар митингдерге катышуу үчүн 90 миң теңге сунуштап чакырып, самолётко билетин алып берип, батирге жайгаштырганын маалымдап чыгышкан.

Көп өтпөй Кыргызстандын ИИМи аталган жаран музыкант Викрам Рузахунов экенин аныктап, анын Алматыга концерт койгону барганын билдирген.

Ошол эле учурда кыргызстандыктар музыкантты террорчу катары көрсөткөнүнө нааразы болуп, аны бошотуу талабы менен Казакстандын Бишкектеги элчилигинин алдына митингге чыккан. Алар менен УКМК төрагасы Камчыбек Ташиев жолугуп, мекендештин укугу корголорун убадалаган.

Көп өтпөй ТИМ Рузахуновду бошотуу талабы менен Казакстанга нота тапшырган.Андан кийин Казакстандын мамлекеттик телеканалдары Рузахуновго байланышкан видеолорун өчүргөн.Ал арада Юстиция министрлиги кыргыз жаранынын кыйноого кабылганын болжоп, Казакстандын күч түзүмдөрүнө кылмыш ишин козгоону Башкы прокуратурага демилгелеген.

Булак: Baleket.kg

Катталуу
Сиздин пикир маанилүү!
guest
0 Комментарий
Баардык комментарийлерди көрүү
Back to top button

This site is protected by wp-copyrightpro.com

0
Өз оюңуз менен бөлүшүңүзx